ต่อไป »

[บุคคลทั่วไป]

กด Link เพื่อร่วมกิจกรรม ผ่านFacebook (หรือกดปุ่มสมัครสมาชิกด้านบน)

[บอม ซอง ดุ๊ก]

นี่คือกลอนแนวภาคพื้นอีสาน บางท่านอาจงงและมึน...ทำใจหน่อยนะครับ 

~รอนางอยู่ข้างเถียง~



ยามฝนซา เขียดตะนา ฮ่องแซวแซว
อ้ายคึดนำ คำแก้ว เป็นแนวได๋
ต๊าวคืนหลัง สาหล่า กลับนาไฮ
พ่อ,แม่ใหญ่ เพิ่นเที่ยวส่อง ครองถ่าเจ้า

จื้อได้บ่ หนอนาง ฮักข้างท่ง
รึว่าหลง กรุงเทพฯ เหมบข้างเขา
ซางมามิด มาจ้อย ลืมฮอยเก่า
ป๋าเถียงน้อย ข่อยกับเจ้า หม่องเก่าเคย

คึดฮอดน้อง ฮ่องไห้ อยู่ใต้โพน
บ่หลูโตน อ้ายแน๊ ยำแม่เอ๋ย
เวียกหนักตี้ จั๊งบ่มี เวลาเลย
ไผน้อเสย ฮักข่อย หลอยไปเสี่ยง 

Oo..ยามน้ำชุ่ม พุ่มข้าว ยาวคาศอก
ปลาลูกคอก สุมหมู่ อยู่ข้างเถียง
ซุมปูน้อย งอยขิไถ ไงดินเปี๊ยง
คู่นกเอี้ยง หลบเอียงซ่น ต้นก้ามปู 
 
ซางมาโหย่ม โฮมฮัก กันคักแท้
ซางมาแห่ โอบตุ้ม ซุมพากสู
คนแห๊งอุก อังเอ้า เจ้าบ่อยู่
อย่ามากู่ แถลงอ้อน ออนซอนคัก

แนมรถเลี้ยว เทียวเบิ่ง เทิงแลนนำ
เห็นดำดำ ดั้งแหมบ แบบฮู่จัก 
คึดว่าน้อง กลับเฮียน เวียนคืนฮัก
กระโดดฮั่ว จนหัวสัก...บ่แม๊นซ่ำ

Oo..ขั่นงานหนัก พักว๊าง ห่างจั๊กนอย
อย่าฟ่าวบู๋ ฟ่าวก้อย ข่อยคึดนำ
พ่อแม่เจ้า เพิ่นหนา ถ่าอำลำ
อยู่ซุมื่อ ซุค่ำ พอซ่ำนี้

เก็บซิ่นพับ กลับนา สาถ่อนเจ้า
อยู่ทางพี่ อ้ายเหงา คักอิหลี
เถียงนาเก่า เฮาปิด มิดซีลี
ย่อนบ่มี อิหล่า มาเทียวท๊อง

ม่มปีหน้า ขายข้าว สิเว่าสู่
หากนางอยู่ ข้างอ้าย สิหมายคล้อง
สิบอกพ่อ ขอหมั้น ขันลงป๊อง
สิเคียงน่อง ครองนา พญาใส่


เด้อนางเดอ..เด้อๆนางเดอ..ทึมๆ    คิดถึงบ้าน


ผู้บ่าวไทบ้าน บอม

[บอม ซอง ดุ๊ก]

คำแปลครับ เผื่อเพื่อนๆอยากรู้ความหมาย 

~รอนางอยู่ข้างเถียง~ (คอยนางอยู่ข้างกระท่อม)



ยามฝนซา เขียดตะนา ฮ่องแซวแซว              (*ฮ่องแซวๆ-ร้องระงับระงม,ร้องอลอึง,เสียงดัง)
อ้ายคึดนำ คำแก้ว เป็นแนวได๋                  (*คึดนำ-คิดตาม // *เป็นแนวได๋-เป็นเช่นไร,ยังไง,อย่างไร)
ต๊าวคืนหลัง สาหล่า กลับนาไฮ                 (*ต๊าว..-หัน,คืน,หวน  // *สาหล่า-ซะเถอะน้อง // *นาไฮ-นาไร่)
พ่อ,แม่ใหญ่ เพินเที่ยวส่อง ครองถ่าเจ้า        (*เพิน-ท่าน,เขา,คนนั้น // *ครองถ่า-คอยอย่างใจจดใจจ่อ)

จื๊อได้บ่ หนอนาง ฮักข้างท่ง              (*จื๊อ-จำ )
รึว่าหลง กรุงเทพฯ เหมบข้างเขา      (*เหมบ-ลักษณะนอนคว่ำหน้าราบกับพื้น,หลบ)
ซางมามิด มาจ้อย ลืมฮอยเก่า        (*ซาง-ช่าง,//*มิด-เงียบ,สงบ,//*จ้อย-ลับไป,นิ่งไป,เงียบหาย)
ป๋าเถียงน้อย ข่อยกับเจ้า หม่องเก่าเคย   (*ป๋า-เลิก,ร้าง,แยกทาง // *ข่อย,เจ้า-ฉัน,เธอ.คุณ.เขา //หม่อง-ที่,สถานที่)

คึดฮอดน้อง ฮ่องไห้ อยู่ใต้โพน       (*ฮ่องไห้-ร้องไห้ //*โพน-จอมดินขนาดใหญ่ที่มีต้นไม้ขึ้นปกคลุม)
บ่หลูโตน อ้ายแน๊ ยำแม่เอ๋ย       (*หลูโตน-สงสาร,เห็นใจ // *แน๊-หน่อย,บ้าง //ยำแม๊-แม่คุณ,คุณเธอ,ผู้หญิง)
เวียกหนักตี้ จั๊งบ่มี เวลาเลย     (*เวียก-งาน,ธุระ,หน้าที่ //*ตี้-เหรอ,หรือยัง//จั๊ง-จึง,ถึง)
ไผน้อเสย ฮักข่อย หลอยไปเสี่ยง   (*เสย-สวน,เฉียด,อุ้ม,อีกนัยคือ-นิ่ง,เฉย,//*หลอย-ขโมย,ลัก//*เสี่ยง-ซ่อน,หลบ)

Oo..ยามน้ำชุ่ม พุ่มข้าว ยาวคาศอก   (*คา-เท่า,ประมาณ)
ปลาลูกคอก สุมหมู่ อยู่ข้างเถียง (*ปลาลูกคอก-ลูกปลาช่อนเกิดใหม่ตัวสีแดง//*สุม-กอง,รวม,ถม)
ซุมปูน้อย งอยขิไถ ไงดินเปี๊ยง   (*ซุม-หมู่,พวก,เหล่านั้น,กลุ่ม//*งอย-เกาะอยู่,จับอยู่//ไง-หลืบ,รู,//*เปี๊ยง-ซีก,ส่วน)
คู่นกเอี้ยง หลบเอียงซ้น ต้นก้ามปู  (*ซ้น-หลบ,ซุก,คาอยู่,)
 
ซางมาโหย่ม โฮมฮัก กันคักแท้  (*โหย่ม-ขย่ม,โยกไปมา//*โฮม-รวม,ชุมนุม,พบปะ//*คัก-สุดยอด,ขนาดหนัก,แน่นอน)
ซางมาแห่ โอบตุ้ม ซุมพากสู   (*ตุ้ม-รวมกัน,มัดรวม,อยู่เป็นกลุ่ม//*พาก-คำสบถภาษาอีสาน,คล้ายไอ้ห่..//สู-คุณ,พวก)
คนแห๊งอุก อังเอ้า เจ้าบ่อยู่       (*แห๊ง-ยิ่ง //*อัง-แคบ,อูดอู้,คับ,แน่นเกินไป //*เอ้า-อบอ้าว,ร้อน)
อย่ามากู่ แถลงอ้อน ออนซอนคัก  (*แถลง-ชักชี้,บรรยาย,พูดถึง,บอกกล่าว//*ออนซอน-แคร์,ใคร่,น่าสนใจ,น่าไส่ใจ)

แนมรถเลี้ยว เทียวเบิ่ง เทิงแลนนำ  (*แนม-มอง,ดู,สังเกตุ//*เบิ่ง-ดู//เทิง-ทั้ง,ออกเสียงทั้งก็ได้,/อีกนัยคือ-บน,ข้างบน)
เห็นดำดำ ดั้งแหมบ แบบฮู่จัก   (*แหมบ-งุ้มเข้า,หักเข้า,แบน,ราบลง//*ฮู้-รู้,เข้าใจ,ทราบ)
คึดว่าน้อง กลับเฮียน เวียนคืนฮัก    (*เฮียน-บ้าน,เรือน,ที่อาศัย//*ฮัก-รัก,เสน่หา,ชอบพอ)
กระโดดฮั่ว จนหัวสัก...บ่แม๊นซ่ำ    (*ฮั่ว-รั้ว//*สัก-ทิ่มหน้าลง,ทิ่มหัวลง,ขมำหัว,/อีกนัย-ปักไว้,เสียบไว้,คาไว้)

Oo..ขั่นงานหนัก พักว๊าง ห่างจั๊กนอย  (*ขั่น-ถ้า//*ว๊าง-เว้นไว้,ทิ้งระยะไว้//*คึดนำ-คิดตาม,คิดถึง,เป็นห่วง,ระลึก)
อย่าฟ่าวบู๋ ฟ่าวก้อย ข่อยคึดนำ (*ฟ่าว-รีบ,เร่ง//*บู๋-บุกเข้าไป,ลุยเข้าไป//*ก้อย-อาการเดินแบบดุ่มๆ,เดี๋ยวมาเดี๋ยวไป)
พ่อแม่เจ้า เพิ่นหนา ถ่าอำลำ (*อำลำ-อยู่อย่างนั้น,อยู่เช่นนั้น,ใจจรดใจจ่อ,ด้วยใจหวัง)
อยู่ซุมื่อ ซุค่ำ พอซำนี้  (*ซุ-ทุก//*มื่อ-วัน//*ซำ-เท่า,พอกัน,คล้ายกัน,/อีกนัย-กระซิบ กระซาบ)

เก็บซิ่นพับ กลับนา สาถ่อนเจ้า (*สาถ่อน-เสียเถิด,เสียเถอะ,ซะเถอะ)
อยู่ทางพี่ อ้ายเหงา คักอิหลี  (*อิหลี-,จริงๆ,ใช่,ถูกต้อง)
เถียงนาเก่า เฮาปิด มิดซีลี  (*มิดซีลี-เงียบ,ไร้เสียง,สงบ,ดับ)
ย่อนบ่มี อิหล่า มาเทียวท๊อง (*ย่อน-,เพราะว่า,เป็นเพราะ//*อิหล่า-สรรพนามเรียกหญิงสาว,สุดท้อง,น้อง//*ท๊อง-ท่อง)

ม่มปีหน้า ขายข้าว สิเว่าสู่  (*ม่ม-พ้น,กลาย,ผ่าน//*เว่าสู่-พูดให้ฟัง,พูดถึง,พูดคุย)
หากนางอยู่ ข้างอ้าย สิหมายคล้อง (*สิ-จะ)
สิบอกพ่อ ขอหมั้น ขันลงป๊อง (*ขัน-หมุน,คลาย,ไข,//*ป๊อง-ช่อง,รู,)
สิเคียงน่อง ครองนา พญาใส่ (*พญา-บทกลอน,ศัพท์เฉพาะ,คำคม,วลีเปรียบเทียบแบบชนพื้นเมืองอิสานสมัยเก่า หนุ่มสาวนิยมใช้ในการเกี้ยวจีบอ้อนซึ่งกันและกัน ,เทศกาล เป็นต้น)


ฮาไว้ อย่าคึดมาก   


ผู้บ่าวไทบ้าน บอม